ސަރުކާރުގެ ބޭންކް ކަމުގައިވާ ބޭންކް އޮފް މޯލްޑިވްސް އަށް އެމެރިކާ ޑޮލަރުގެ ރިޒާވް ދަށްވެ އެ ބޭންއިން ބަހައްޓާފައިވާ ޑޮލަރު އޭޓީއެމްގެ ޚިދުމަތްތައް މެދުކަނޑާލައިފި އެވެ.
ސޯޝަލް މީޑިޔާގައި ސަރުކާރާއި ސަރުކާރު ހިއްސާވާ ކުންފުނިތަކުގެ މިފަދަ ސިއްރު މައުލޫމާތުތައް ހާމަ ކުރަމުން ގެންދާ ހަސަން ކުރުސީ ބުނެފައިވާ ގޮތުން ރެއިން ފެށިގެން އޭޓީއެމްގެ ޚިދުމަތްތައް ހުއްޓިފައިވާއިރު މިއަދުން ފެށިގެން ބީއެމްއެލްގެ ވިސާ ޑެބިޓް ކާޑަށް ކަނޑައަޅާފައިވާ 250 އެމެރިކާ ޑޮލަރުގެ ލިމިޓްވެސް އުވާލާނެ އެވެ. އަދި މިކަމާއި ގުޅޭ ގޮތުން މިއަދު ބޭންކް އިން ބަޔާނެއް ނެރޭނެ ކަމަށްވެސް ހަސަން ކުރުސީ ވަނީ ބުނެފައެވެ.
ހަސަން ކުރުސީ ވަނީ މީގެ ކުރިން ބީއެމްއެލް މިފަދަ ބަދަލެއް ގެންނަން މަސައްކަތް ކުރަމުންދާކަމަށް ބުނެފައެވެ. އެ ގޮތުން ރާއްޖެއިން ބޭރުގައި ތިބޭ ކިޔަވާ ކުދިންނަށް ކުރިން ހަމަޖެހިފައިވާ 1000 އެމެރިކާ ޑޮލަރުގެ ލިމިޓް ކުޑަކުރާނެ ކަމަށްވެސް ބުނެފައިވާއިރު އެ ބަދަލު ބޭންކް އިން ވަނީ މިހާރު ގެނެސްފައެވެ.
ރިޔާސީ އިންތިޚާބުގެ ކެމްޕޭން ދުވަސްވަރު ޑރ. މުއިއްޒު ވަނީ ޑޮލަރަށް ކުރިމަތިވެފައިވާ މައްސަލަ ހައްލު ކުރައްވާނެކަމަށް ވިދާޅުވެފައެވެ. އަދި އިކޮނޮމިކް މިނިސްޓަރ ވަނީ މަގާމާއި ހަވާލުވުމަށްފަހު ތިން ހަތަރު މަހެއްހާ ދުވަހުގެ ތެރޭގައި ޑޮލަރުގެ މައްސަލަ ހައްލު ކުރައްވާނެކަމަށް ވިދާޅުވެފައެވެ. ނަމަވެސް އެ މުއްދަތު ފާއިތުވެގެން ދިޔައިރު ދުވަހަކުވެސް ޑޮލަރު އަގު ކަޅު ބާޒާރުގައި މައްޗަށް ނުދާވަރަށް މިހާރު ވަނީ ޑޮލަރުގެ އަގު އުފުލިފައެވެ.
މިސަރުކާރުން މިހަތަނަށް ފުއްދަވާނެކަމަށް ވިދާޅުވެފައިވާ އެއްވެސް ވައުދެއް ފުއްދިފައެއް ނުވެއެވެ.
