ނިމިގެންދިޔަ ރިޔާސީ އިންތިޚާބުގެ ކެމްޕޭނު ތެރޭގައި ޑރ. މުހައްމަދު މުއިއްޒުގެ ރިޔާސީ ވައުދެއްގެ ގޮތުގައި ފާހަގަ ކުރެއްވި އެއް ކަމަކީ ދައުލަތުގެ ޚަރަދުގައި ނިކަމެތިން ހައްޖަށް ފޮނުއްވާނެ ކަމުގެ ވައުދެވެ.
ނަމަވެސް އިންތިޚާބު ކާމިޔާބުކޮށް ހައްޖަށް މީހުން ފޮނުވާފައިވާއިރު އޭގެ ތެރޭގައި ހިމެނޭ 50 މީހުންގެ ތެރެއިން ގިނަ ބަޔަކީ ވެރިކަން ކުރާ ޕީއެންސީގެ އިސް ސަފުގައި ހަރަކާތްތެރިވާ ފަރާތްތަކުގެ ގާތް ތިމާގެ މީހުންނާއި އެކުވެރިންނެވެ. އޭގެ ތެރޭގައި ވަޒީފާތަކުގައި އުޅޭ މީހުންނާއި އެކި ފެންވަރުގައި ވިޔަފާރި ކުރާ ފަރާތްތަކާއި އެފެރާތްތަކުގެ އާއިލާތައް ހިމެނެއެވެ. އެހެންކަމުން ސަރުކާރުގެ ޚަރަދުގައި ހައްޖަށް މީހުން ފޮނުވަނީ އެންމެ ރަގަޅަށްތޯ ގިނަ ބަޔަކު ދަނީ ސުވާލު އުފައްދަމުންނެވެ.
ދައުލަތުގެ ޚަރަދުގައި ހައްޖަށް ފޮނުވާފައިވާ 50 މީހުންގެ ލިސްޓް ރަސްމީކޮށް އިސްލާމިން މިނިސްޓްރީން އާންމުކޮށްފައިނުވި ނަމަވެސް އެ ލިސްޓްވަނީ ސޯޝަލް މީޑީޔާގައި ދައުރުވާން ފަށާފައެވެ. އަދި މި ލިސްޓާއި ގުޅޭ ގޮތުން މިނިސްޓްރީން އެއްވެސް އެއްޗެއް މިހާތަނަށް ބުނެފައެއް ނުވެއެވެ.
ކޮރަޕްޝަނާއި ވައްކަން އިންތިހާއަށް ބޮޑުވެފައިވާ މި ސަރުކާރުން މިފަދަ ކޮރަޕްޝަން ހިމެނޭ ގިނަ ކަންތައްތަކެއް ކުރަމުންދާއިރު, އެކަމަށް ހެދިފައިވާ މުައްސަސަތަކުން މިހާތަނަށް އެއްވެސް ކަމެއް ބަލާފައެއް ނުވެއެވެ.
