މޯލްޑިވްސް މަނިޓަރީ އޮތޯރިޓީގެ ގަވަރުނަރު ބަދަލުކުރިޔަސް މެނޭޖް ކުރަން ނޭނގޭ ބަޔަކަށް ނުވާނެ ކަމަށް ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެ އެވެ.
ގަވަރުނަރު ވަކިކުރުމާއި ގުޅޭ ގޮތުން މަޖިލީހުގައި ބަހުސް ކުރުމުގެ މަރުހަލާގައި ނާޒިލް ވިދާޅުވީ ދެ ގަވަރުނަރުން ނުވަތަ ތިން މީހުން ލިޔަސް ނޭނގޭ ބަޔަކަށް ނުކުރެވޭނެ ކަމަށެވެ.
“ދެ ގަވަރުނަރުން ލިޔަސް ތިން މީހުން ލިޔަސް ނުކުރެވޭނެ. މާލިއްޔަތު ކޮމިޓީގެ ޗެއާ އެ ވިދާޅުވަނީ ކޮވިޑު މެނޭޖުކުރީ ގޯސްކޮށޭ. އެ ބޭފުޅާ ކޮވިޑާ އެކީގައި އެންމެ ފުރަތަމަ ދިވެހި ރައްޔިތުން ވަޒީފާއިން ވަކިކުރަން ފެށީ” ނާޒިލް ވިދާޅުވިއެވެ.
ނާޒިލް އިތުރަށް ވިދާޅުވީ މަގާމުން ވަކިކުރުމަކީ ހައްލެއް ނޫން ކަމަށާއި ސަރުކާރަށް އެކަން ކުރަން ނޭނގޭ ކަމަށެވެ. ނާޒިލް ވަނީ ސަރުކާރުގެ ގިނަ ނިންމުންތަކަށް 20 ވަނަ މަޖިލީހުގައި ވަރަށް ބޮޑަށް ފާޑު ވިދާޅުވެ ވާހަކަ ދައްކާފައެވެ.
